اکتوبر 24 تا 30 اکتوبر، 2019

زراعت

اینگرو فرٹیلائزر کے چیف فنانشل افسر عمران احمد نے اخباری نمائندوں سے بات کرتے ہوئے کہا ہے کہ اسمارٹ زرتلافی یعنی موثر طریقوں سے زرتلافی کی فراہمی جیسے اقدامات نہ صرف چھوٹے کسانوں کی آمدنی میں اضافے کا سبب ہونگے بلکہ اس سے پاکستان کا زرعی شعبہ بھی ترقی کرے گا۔ پاکستان میں زیادہ تر زمینی ملکیت 10 فیصد امیر ترین افراد کے ہاتھوں میں مرتکز ہے جو 50 فیصد زمین زرعی زمین کے مالک ہیں۔ جبکہ بقیہ 90 فیصد کسانوں کے پاس بہت کم زرعی زمین ہے۔ یہ اعداوشمار پاکستان میں چھوٹے کسانوں کی اہمیت کو ظاہر کرتے ہیں۔ اس صورتحال میں حکومت کی طرف سے یوریا کی پیداوار پر درآمدی مائع قدرتی گیس (ایل این جی) کے ذریعے دی جانے والی زرتلافی براہ راست اور بلاتفریق بڑے جاگیرداروں کو فائدہ پہنچارہی ہے جن کی زرعی آمدنی پر کوئی ٹیکس نہیں ہے۔
(دی ایکسپریس ٹریبیون، 24 اکتوبر، صفحہ20)

گندم

سیکریٹری وزارت قومی غذائی تحفظ و تحقیق ہاشم پوپلزئی نے سینٹ کی قائمہ کمیٹی میں انکشاف کیا ہے کہ سندھ اور کے پی کے میں آٹے کے حوالے سے جاری پریشان کن صورتحال میں وفاقی حکومت گندم درآمد کرنے کی تجویز کا جائزہ لے رہی ہے۔ انہوں نے مزید بتایا کہ پنجاب حکومت گندم 1,375 روپے فی من بمعہ باردانہ آٹا ملوں کو فراہم کررہی ہے جبکہ آٹے کی قیمت 1,650 روپے فی من ہے۔ تاہم سندھ اور کے پی کے میں آٹے کی قیمت 1,850 سے 1,950 روپے فی من ہے جو پنجاب سے 18 فیصد زیادہ ہے۔ سندھ میں بحران کی وجہ صوبائی حکومت کی گندم کی سرکاری خریداری میں ناکامی ہے۔ کے پی کے حکومت نے بھی مقرر کردہ ہدف کے مطابق گندم کی خریداری نہیں کی۔
(بزنس ریکارڈر، 24 اکتوبر، صفحہ1)

پنجاب حکومت کی جانب سے گندم اور آٹے کی بین الصوبائی نقل و حمل پر پابندی کے بعد خیبر پختونخوا میں آٹے کی قلت کا خطرہ پیدا ہوگیا ہے۔ یہ پابندی پشاور میں آٹے کی قیمت میں اچانک اضافے کی وجہ بنی ہے۔ پاکستان فلور ملز ایسوسی ایشن خیبرپختونخوا کے چیئرمین حاجی محمد اقبال نے کہا ہے کہ پنجاب حکومت نے بغیر کسی وجہ کے گندم کی ترسیل روک دی ہے۔ کے پی کے اپنی طلب کا 95 فیصد آٹا پنجاب سے خریدتا ہے، گندم کی ترسیل پر پابندی صوبے میں آٹے کے شدید بحران کی وجہ بنے گی۔ ”ہم نے کے پی کے حکومت کے سامنے یہ معاملہ اٹھایا لیکن بدقسمتی سے کوئی بھی اس پر توجہ نہیں دینا چاہتا“۔
(ڈان، 26اکتوبر، صفحہ7)

سندھ حکومت کی جانب سے 100 کلو گرام گندم کی قیمت 3,250 سے بڑھا کر 3,450 روپے کیے جانے کے بعد ملوں نے آٹے قیمتوں میں مزید اضافہ کردیا ہے۔ قیمتوں میں حالیہ اضافے کے بعد ڈھائی نمبر 10 کلو گرام آٹے کی قیمت 485 روپے ہوگئی ہے جو پہلے 480 روپے تھی۔ ملوں کی جانب سے میدہ اور فائن آٹے کی پرانی کی قیمت 50.50 روپے فی کلو کے مقابلہ میں نئی قیمت 52.50 روپے فی کلو جاری کی گئی ہے۔ ماہ اپریل سے اب تک ڈھائی نمبر آٹے کی قیمت میں 14.50 روپے فی کلو، میدہ اور فائن آٹے کی قیمت میں 16 روپے فی کلو اضافہ ہوا ہے۔
(ڈان، 27 اکتوبر، صفحہ10)

گندم اور آٹے کی قلت اور اس کی قیمت میں اضافے پر قابو پانے کے لئے خیبر پختونخوا حکومت نے افغانستان اور دیگر صوبوں کو ان اشیاء کی برآمد پر دفعہ 144 کے تحت پابندی عائد کرنے کا فیصلہ کیا ہے۔ وزیر اعلی خیبر پختونخوا محمود خان نے حطار خصوصی اقتصادی زون کے قیام کے حوالے سے ایک اجلاس کی صدارت کرتے ہوئے مزید کہا ہے کہ صوبہ میں گندم اور آٹے کی وافر مقدار دستیاب ہے۔ وفاقی حکومت نے بھی صوبے کو 300,000 ٹن اضافی گندم فراہم کرنے پر اتفاق کیا ہے۔ وزیر اعلی نے قلت سے بچنے کے لئے ذخیرہ اندوزوں خلاف سخت کاروائی کرنے کا حکم دیا ہے۔
(دی ایکسپریس ٹربیون، 29 اکتوبر، صفحہ6)

کپاس

سینٹ کی قائمہ کمیٹی برائے قومی غذائی تحفظ و تحقیق کی صدارت کرتے ہوئے سینٹر مظفر حسین شاہ نے کہا ہے کہ گرمی کی لہر کی وجہ سے ملک میں اور خصوصاً زیریں سندھ میں ایک تہائی کپاس برباد ہوگئی ہے۔ انھوں گرمی اور کیڑے مکوڑوں کے خلاف مدافعت رکھنے والے اور زیادہ پیداوار دینے والے بیج تیار کرنے کی ضرورت پر زور دیتے ہوئے کہا ہے کہ اس سال کپاس کی پیداوار 10 ملین گانٹھیں متوقع ہے جبکہ اس کا پیداواری ہدف 15 ملین گانٹھیں تھا۔ سینٹر مظفر حسین شاہ نے ملک بھر میں کپاس کے حوالے سے ہنگامی حالت (ایمرجنسی) نافذ کرنے پر بھی زور دیا ہے۔
(دی ایکسپریس ٹریبیون، 24 اکتوبر، صفحہ20)

کراچی کاٹن ایسوسی ایشن نے حکومت پر کپاس کی کم ہوتی ہوئی پیداوار پر قابو پانے کے لئے ہنگامی حالت کے اعلان پر زور دیا ہے۔ ایسوسی ایشن نے اس کے علاوہ کپاس کے زیر کاشت علاقوں میں چاول و گنے کی کاشت پر اور شوگر ملوں کے قیام پر بھی پابندی کا مطالبہ کیا ہے۔ کپاس کی پیداوار میں کمی پر شدید تحفظات کا اظہار کرتے ہوئے ایسوسی ایشن کا کہنا تھا کہ کپاس کے زیرکاشت رقبے میں اضافے کے لیے فوری طور پر عملی اقدامات کرنے کی ضرورت ہے۔ کپاس کے علاقے میں گنے کی کاشت، غیر مصدقہ بیج اور جراثیم کش زہر کپاس کی فصل میں تیزی سے کمی کے اسباب ہیں۔
(ڈان، 30 اکتوبر، صفحہ10)

گنا

سندھ ہائی کورٹ نے گنے کے کاشتکاروں کے واجبات کی ادائیگی میں تاخیر پر تحفظات کا اظہار کرتے ہوئے صوبائی سیکریٹری زرعت کو 17 نومبر کو ذاتی حیثیت میں پیش ہونے اور سندھ کے گنا کمشنر کے متواتر تبادلے پر وضاحت طلب کی ہے۔ عدالت کا کہنا تھا کہ کاشتکاروں کے واجبات کی ادائیگی کے لئے عدالت کی جانب سے تشکیل کردہ کمیٹی کے ایک رکن (سیکریٹری زراعت) واضح ہدایت کے باوجود بھی ان کاشتکاروں کی فہرست اپنے ہمراہ نہیں لاسکے جنہیں اب تک ادائیگی نہیں کی گئی ہے۔ عدالت کا مزید کہنا تھا کہ فہرست جمع ہونے کے بعد عدالت مل مالکان کے نمائندوں سے جواب طلب کرے گی کہ آیا کاشتکاروں کو واجبات ادا کیے گئے ہیں یا نہیں۔
(ڈان، 24 اکتوبر، صفحہ17)

موسمی تبدیلی

ایک اخباری رپورٹ کے مطابق کے پی کے سے تعلق رکھنے والے ایک کسان سعد اللہ خان کا کہنا ہے کہ ایک وقت تھا جب ان کی زمینوں سے بہت زیادہ پیداوار ہوتی تھی اور کسان کھلی منڈی میں زائد پیداوار فروخت کردیا کرتے تھے۔ تاہم اس سال ہونیوالی پیداوار سے صرف خاندان کی ضرورت کو ہی پورا کیا جاسکتا ہے۔ ماہرین کا کہنا ہے کہ پورے خیبر پختونخواہ میں موسمی تبدیلی کے اثرات کاشتکاروں پر ظاہر ہونا شروع ہوگئے ہیں اور موسمی تبدیلی خیبر پختونخوا سمیت ملک بھر میں غذائی تحفظ کے لیے خطرہ بن رہی ہے۔ پشاور یونیورسٹی کے شعبہ ماحولیات کے پروفیسر ڈاکٹر آصف خان کا کہنا ہے کہ ایک طرف تو آبادی میں اضافے سے خوراک کی طلب بڑھتی جارہی ہے جبکہ دوسری طرف انسانوں کی پیدا کردہ ماحولیاتی تبدیلی زراعت کو واضح طور پر متاثر کررہی ہے۔ طویل ہوتے موسم گرما میں گندم کی کاشت میں تاخیر ہوتی ہے۔ فصل کو پھول بننے کے عمل میں مناسب ٹھنڈے موسم کی ضرورت ہوتی ہے۔ بیجائی میں تاخیر سے پھول بننے کا یہ عمل خطرے سے دوچار ہوجاتا ہے۔
(دی ایکسپریس ٹریبیون، 25 اکتوبر، صفحہ6)

صدر فارمرز بیورو آف پاکستان ڈاکٹر ظفر حیات نے حکومت سے مطالبہ کیا ہے کہ وہ حالیہ گرمی کی لہر سے متاثرہ علاقوں میں ہنگامی حالت کا اعلان کرے۔ کپاس، مکئی اور چاول کی فصل کو ہونے والے نقصانات کا اندراج کرکے کسانوں کے لیے مراعات کا اعلان کرے تاکہ وہ اگلی فصلیں کاشت کرنے کے قابل ہوں۔ ان کا مزید کہنا تھا کہ کپاس کی پیداوار میں کمی صرف کسانوں کو ہی نہیں بلکہ کپڑے کی صنعت اور برآمدات میں کمی کی صورت قومی معیشت کو بھی متاثر کررہی ہے۔ اسی طرح مکئی کی خراب فصل مرغبانی صنعت کو متاثر کرے گی جو مکئی کو بطور اہم خوراک استعمال کرتی ہے۔ چاول کی صورتحال بھی مختلف نہیں جس سے سالانہ دو سے ڈھائی بلین ڈالر زرمبادلہ حاصل ہوتا ہے۔ چاول کی ناقص فصل کی وجہ سے اس کی پیداوار میں 20 سے 35 فیصد کمی کا سامنا ہوسکتا ہے۔
(ڈان، 26 اکتوبر، صفحہ2)

ماحول

کراچی یونیورسٹی میں پلاسٹک کی آلودگی کے حوالے سے منعقد ہونے والے ایک سیمنار میں بتایا گیا کہ دنیا بھر میں ممالک اور سمندروں کو پلاسٹک سے پاک کرنے کی مہمات مستحکم ہوتی جارہی ہیں جبکہ پاکستان میں پلاسٹک سازی کی صنعت سالانہ 15 فیصد ترقی کررہی ہے۔ پاکستان میں اندازاً سالانہ 624,200 ٹن پلاسٹک تیار کیا جارہا ہے اور ملک میں پلاسٹک کی مصنوعات بنانے والے تقریباً 6,000 کارخانے ہیں۔ دریائے سندھ کے ذریعے سالانہ 164,332 ٹن پلاسٹک سمندر میں جاگرتا ہے۔ ورلڈ وائڈ فنڈ فار نیچر پاکستان کی نمائندہ شاہ زین پرویز کا اس موقع پر کہنا تھا کہ ”دریائے سندھ دنیا میں دوسرا پلاسٹک سے سب سے زیادہ آلودہ دریا ہے جبکہ پہلا، تیسرا اور چوتھا سب سے زیادہ آلودہ دریا چین میں ہے۔ افریقہ کا دریائے نیل دریائی آلودگی میں پانچویں نمبر پر ہے۔
(ڈان، 24 اکتوبر، صفحہ16)

غذائی کمی

آغا خان یونیورسٹی میں ہونے والی تین روزہ بین الاقوامی کانفرنس ”نیوٹریشن اینڈ ارلی ہیومن ڈیولپمنٹ“ میں ماہرین کا کہنا تھاکہ پاکستان میں بچوں میں حیاتین (وٹامن) اور معدنیات (منرل) کی تشویشناک کمی ترقی کے حصول کے لیے ممکنہ صلاحیت کو متاثر کررہی ہے۔ ماہرین نے حکومت پر زرو دیا ہے کہ وہ ابتدائی عمر میں نشونماکے لئے جامع حکمت عملی اپنائیں۔ اس کانفرنس کے اہم موضاعات میں قومی غذائی سروے 2018 سرفہرست تھا۔ سرو ے سے پتہ چلتا ہے کہ ملک بھر میں ہر دس میں سے چھ (62.7 فیصد) بچے وٹامن ڈی کی کمی کا شکار ہیں جبکہ پانچ سال سے کم عمر کے 53.7 فیصد بچے خون کی کمی اور 51.5 فیصد بچے وٹامن اے کی کمی کا شکار ہیں۔ کانفرنس کے دوران ماہرین نے پاکستان میں وزارت صحت برائے اطفال (منسٹری آف چائلڈ ہیلتھ) قائم کرنے کی تجویز بھی دی ہے جو ملک میں باہم جڑے ہوئے ترقیاتی مسائل کے لیے طویل المدت حکمت عملی بناسکے۔
(ڈان، 27 اکتوبر، صفحہ16)

کھاد کمپنیاں

ایک خبر کے مطابق 30 ستمبر 2019 تک نو ماہ میں فوجی فرٹیلائزر کمپنی نے 13.2 بلین روپے بعد از محصول منافع کا اعلان کیا ہے۔ گزشتہ سال اسی دورانیے میں کمپنی نے 10 بلین روپے منافع کا اعلان کیا تھا۔ نوماہ کے دورانیے میں کمپنی کی فروخت کا حجم 73.02 بلین روپے تھا۔
(دی ایکسپریس ٹریبیون، 29 اکتوبر، صفحہ20)

نکتہ نظر

اس ہفتے کی خبریں بھی گزشتہ کئی ہفتوں کی طرح زرعی شعبہ میں کوئی قابل زکر پیش رفت کے بغیر ہی کہیں گندم کی قلت، تو کہیں موسمی تبدیلی کی وجہ سے ہونے والے نقصانات کا احوال بیان کررہی ہیں۔ لیکن ہمیشہ کی طرح ایک شعبہ ہے جس میں بمشکل نقصان کی خبر سامنے آتی ہو اور وہ ہے زراعت میں استعمال ہونے والے مداخل تیار کرنے اور فروخت کرنے والا شعبہ۔ ہر حکومت میں چاہے وہ سیاسی ہو یا فوجی یہ سرمایہ دار طبقہ ٹیکسوں میں چھوٹ اور مراعات کا حقدار ٹھہرایا گیا۔ جبکہ ملک کے 90 فیصد چھوٹے اور بے زمین کسان سرکاری زرتلافی اور مراعات سے محروم رہ جاتے ہیں جس کا اقرار خود مداخل تیار کرنے والی کمپنی کررہی ہے۔ بین الاقوامی تجارتی قوانین کی پاسداری کرتے ہوئے آزاد منڈی کے اصولوں پر کاربند حکومت گندم سے لے کر دودھ گوشت جیسی لازمی غذائی اشیاء تک تمام پیداوارکی تجارت اور اس پر اختیار منڈی کو سونپنے پر کمربستہ ہے۔ یہ حکمت عملی ایک طرف مداخل کی قیمت میں اضافے کی صورت چھوٹے کسانوں کو نقصان سے دوچار کررہی ہے جبکہ دوسری طرف عام صارف زیادہ قیمت دے کر یہ لازمی غذائی اشیاء خریدنے پر مجبور کردیا ہے گیا جو ملک میں مزید بھوک اور غذائی کمی میں اضافے کا سبب بنے گی جبکہ پہلے ہی بھوک اور غذائی کمی کے اشارے تشویشناک صورتحال بیان کررہے ہیں۔ آزاد تجارتی پالیسیاں اور غیرپائیدار طریقہ پیداوار ہی ملک میں چھوٹے اور بے زمین کسان مزدوروں میں بھوک غربت، غذائی کمی، ماحول کی تباہی اور موسمی تبدیلی کی ذمہ دار ہیں جن سے نجات صرف اور صرف پائیدار طریقہ زراعت ہے۔ اور پائیدار طریقہ زراعت پر عمل پیرا ہونے کے لیے یہ بھی لازم ہے کہ ملک کی 50 فیصد زرعی زمین جس پر صرف 10فیصد جاگیر دار سرمایہ دار قابض ہیں وہ بھی واپس لی جائے اور ملک کی تمام زرعی زمین چھوٹے اور بے زمین کسان مزدوروں میں منصفانہ اور مساویانہ بنیادوں پر تقسیم کی جائے۔